Көрнекті орындар

• “Көне-Тараз”тарихи-этномәдени кешені

Жамбыл облысының 80 жылдығына арналып ашылған нысандардың бірегейі Шаһардың қақ ортасынан орын алған «Көне-Тараз» тарихи-этномәдени кешені. Орта Азияда баламасы жоқ алып кешенді Тараздың 2000 жылдық тарихын қайта тірілткен «Ғажайып сәулет құрылысы»  деп атауға толық негіз бар! Мыңжылдықтардың куәсі киелі өлкенің руханиятын оятып, рухын асқақтатқан, мерейін өсіріп, мазмұнын арттырған   жоба жамбылдықтар үшін теңдесіз жоба болғаны сөзсіз.

• «Қазақ хандығы» монументі

Ескерткіш – Тәуке хан көшесінің бойындағы қаланың ең көрікті алаңдарының біріне, Қазақ хандығының 550 жылдық мерейтойына арналып салынған монумент. Мүсіндік композиция ақ мәрмәрден жасалған 27 м. стелла және оның екі жағында Керей хан мен Жәнібек хан тақта отыр. Керейдің қолында қағаз бен қалам бар. Ол хандықтың алғаш осы өңірде құрылғандығы туралы Жарлық етіп жатқанын білдіреді. Ал, Жәнібектің қолындағы найзасы мен тізесіне қойған қылышы әрі жас, өзі хас батырдың қажыр-қайратын, ерік-жігерін сомдайды.

• «Қазақ халқына мың алғыс» монументі;

Монументтің басты мәні — Қазақстан халқы ассамблеясының мерейтойын атап өту, ұлттар арасында достық пен бибітшілікті сақтау және насихаттау, жастардың бойында патриоттық сезім мен өз халқының тарихына деген құрмет сезімін қалыптастыру. Жаңа бой көтерген Арбат — Тараз қаласының арихтектуралық жетістіктердің жалғасы болып табылады. Қашықтығы 580 метрді құрайтын нысан Ақкөзиев көшесімен Сыпатай батыр көшелері арасында орналасқан.

• “Тектұрмас” этно-тарихи кешені

“Тектұрмас” этно-тарихи кешені 2019 жылы ашылған. Нысан Жамбыл облысының 80 жылдығына орай салынды. Ежелгі Тараз қаласының төл тарихын көрсететін кешен Талас өзенінің жоғары жағалауында 24 гектар аумақта орналасқан. Тарихи кешен – Тараз өңіріндегі ортағасырлық түркі елдерінің қасиетті мекенін көрсететін, түркі тарихынан сыр шертетін тарихнама ретінде әрі демалыс орны негізінде халқымыздың рухани жан-дүниесін байытып, туризмді дамыту мақсатында салынған. Мұнда қалаға жоғарыдан қарап, түрлі түске боялған түнгі Таразды тамашалауға болады. Жалпы, «Тектұрмас» этно-тарихи кешеніндегі «Көне Тараз» нысанындағы жағалаудың ұзындығы 1423 метрді құраса, қоршап тұратын қорғанның ұзындығы 220 метр. Нысанға кірген кездегі оң жақ қабырғасы жасанды тастармен көмкеріліп, көне түркі жазулары, петроглифтер салынған. Нысанның кіре берісінен жағалаудың соңына дейін сан түрлі түстегі самаладай жарқырайтын шамдармен көмкерілген 86 аралық ағаш баспалдақ орналасқан.

• Ақыртас сарай кешені (VІІІ-ХІІ ғ.ғ.)

Ақыртас толық аяқталмаған, құпияға толы ортағасырлық сарайы кешені. Сарай кешені 70-ке жуық бөлмелер мен 15 колонналы галереядан тұрады.Кешен үлкен бітеу өңдеген тастардан тұрғызылған.

Ақыртас кешені – күрделі құпияға толы нысан ретінде Египет кереметтері, Афины Акропольдары, Рим колизейі, Перудегі Майя сарайлары және Антикалық аңыздармен деңгейлес жатқан алып құрылыс деңгейінде бағалануда. Археологиялық және ғылыми зерттеулердің нәтижесінде Ақыртас маңынан бірнеше нысандар табылды: керуен-сарай кешені және монументальды құрылыс.

Ұлы Жібек жолы бойында орналасқан Ақыртас кешені 2014 жылы 25 маусымда Катар мемлекетінің Доха қаласында өткен ЮНЕСКО-ның 38 сессиясы барысында Бүкіләлемдік Мәдени Мұралар тізіміне енгізілді.